ગીત

પહેલી વસંત તણું પહેલું તે પાંદડું
મેં સાચવીને રાખ્યું છે પાસમાં
પછી એને વણી લીધું શ્વાસમાં ....

આમ તો વસંત જેવું કંઈ નહીં ને આમ વળી

અંતરમાં ઉગે ગરમાળો

પાંપણ ઝુકે ત્યાં કોક અમથું તે સાંભરે

ને જીવ બધો થાતો શરમાળો
સાથે જીવ્યાના જુગ પળ શા થઇ જાય
એવું આયખું તે ઉઘડે અજવાસમાં ...

અમથી વસંત એમ વહાલી ના લાગે
ને અમથા ના વિસરાતા ભાન
પંખીઓ એમ વળી દલડાની ડાળ પરે
અમથા કંઈ છેડે ના ગાન
જીવતર તો જુઈ તણાં ફૂલ સમું હાશ
હવે ગમતીલા કોઈના સહવાસમાં....